ایرانی بحریہ کا ایک جہاز دوستانہ فائر کے باعث سمندر میں ڈوب گیا، غیرمصدقہ اطلاعات کے مطابق اس واقعہ میں درجنوں افراد ہلاک ہو گئے ہیں۔
مقامی صحافیوں کا کہنا ہے کہ ایرانی فریگیٹ جماران ایک نئے اینٹی شپ میزائل کا تجربہ کر رہا تھا جس نے غلطی سے ایک لاجسٹک بحری جہاز کونارک کو تباہ کر دیا۔
ایران کی نیم سرکاری خبررساں ایجنسی فرس کا کہنا ہے کہ بحری مشقوں کے دوران حادثاتی طور پر بحریہ کا ایک جوان ہلاک اور متعدد زخمی ہو گئے ہیں۔
غیرسرکاری ذرائع کے مطابق ایران کے انقلابی گارڈز نے جماران سے وقت سے پہلے ہی میزائل فائر کر دیا اور کونارک کو تیرتے ہوئے ہدف سے دور جانے کا موقع نہ مل سکا اور وہ نشانے میں آ گیا۔
ٹی آر ٹی ورلڈ کا کہنا ہے کہ تباہ ہونے والے جہاز پر 30 سے 40 افراد موجود تھے، مقامی ذرائع کے مطابق اس واقعے میں نیوی کے کم از کم 20 اہلکار ہلاک ہو گئے ہیں،
سوشل میڈیا پر سامنے آنے والی ویڈیوز میں دکھایا گیا ہے کہ ایرانی بحریہ کے عملے کو ایمبولینس کے ذریعے اسپتال منتقل کیا جا رہا ہے، یہ واقعہ آبنائے ہرمز میں پیش آیا۔
یاد رہے کہ جنوری میں انقلابی گارڈز نے غلطی سے یوکرین کے ایک مسافر طیارے کو تہران کے قریب مار گرایا تھا، اس واقعے میں تمام 176 مسافر ہلاک ہو گئے تھے۔
