کورونا وائرس پر کامیابی سے قابو پانے والا ملک جنوبی کوریا وائرس کی دوسری لہر کی لپیٹ میں آ گیا ہے۔ پابندیوں میں نرمی کے دوران نائٹ کلب جانیوالے شہری وبا سے متاثر ہو گئے۔ نائٹ کلب جانیوالے ایک 29 سالہ مریض نے 54 افراد کو وائرس لگا دیا ہے۔
جنوبی کوریا کے حکام کا کہنا ہے کہ ایک ہفتہ میں نائٹ کلب جانیوالے 6 سے7 ہزار افراد کے وائرس سے متاثر ہونے کاخدشہ ہے۔
تمام ممالک کورونا کی دوسری اور تیسری لہر کے لیے تیار رہیں، عالمی ادارہ صحت کا انتباہ
چین اور جنوبی کوریا میں کورونا وبا کی دوسری لہر شروع ہو گئی
کلب جانیوالے افراد میں کورونا کیسز سامنے آنے کے بعد جنوبی کوریا کی حکومت نے دارالحکومت سیول میں 2100 سے زائد نائٹ کلبز، بارز اور ڈسکوز بند کر دیے ہیں۔
جنوبی کوریا میں کورونا وائرس کی دوسری لہر میں سامنے آنیوالے کیسز میں سے 30 فیصد ایسے ہیں جن میں مریضوں میں کورونا کی کوئی علامات نہیں ہیں۔
کورونا وبا کی پہلی لہر پر کامیابی سے قابو پانے کے بعد جنوبی کوریا نارمل حالات کی طرف لوٹنے لگا تھا۔ ملک کی ٹاپ فٹ بال لیگ”کے لیگ“ کو دوبارہ سے شروع کر دیا گیا تھا، یہ لیگ 8 مئی سے شروع کی گئی۔
لیگ کیلئے جاری نئے قوانین کے مطابق کھلاڑی ایک دوسرے سے ہاتھ نہیں ملا سکتے اور کھیل کے دوران ایک دوسرے سے بات چیت بھی منع ہے۔ قوانین کے مطابق کوچز کیلئے کھیل کے دوران فیس ماسک پہننا ضروری ہیں۔
لیگ میں شریک ایک ٹیم کے کپتان کا کہنا ہے کہ کھیل کے دوران کھلاڑیوں کا ایک دوسرے سے بات نہ کرنا ناممکن کام ہے، ان کا کہنا تھا کہ کھیل کے دوران ساتھی کھلاڑیوں سے نہ بولنے سے کھیلنا ناممکن ہے۔
جنوبی کوریا میں کورونا وائرس کیسز کی تعداد 10,909 ہے جبکہ وائرس سے ہونیوالی اموات کی تعداد 256 ہے۔
