مریم نواز اور ارتغرل غازی ایک جیسی قائدانہ خصوصیات کے مالک ہیں، حنا پرویز بٹ

پاکستان مسلم لیگ ن کی لاہور سے ممبر صوبائی اسمبلی حنا پرویز بٹ نے کہا ہے کہ وہ آج کل ترکی کا مشہور ڈرامہ ارتغرل غازی دیکھ رہی ہیں اور اس سے ظاہر ہوتا ہے کہ ڈرامے کے ہیرو اور مریم نواز میں لیڈرشپ خصوصیات ایک جیسی ہیں۔

حنا پرویز کا کہنا تھا کہ مریم نواز کا خدا پر مضبوط ایمان، حوصلہ نہ ہارنے کی خصوصیت، اپنے موقف پر اس وقت بھی قائم رہنا جب ہر کوئی آپ کے خلاف ہو اور صیح وغلط میں تمیز کی خصوصیت سے ظاہر ہوتا ہے کہ ارتغرل اور مریم نواز ایک جیسی لیڈرشپ کوالٹی رکھتے ہیں۔

ٹویٹر پر ان کے اس ٹویٹ کے بعد سوشل میڈیا پر بحث نے جنم لے لیا ہے۔

I am watching Ertugrul nowadays & I see Maryam Nawaz has similar leadership qualities as him.Her Strong belief in God,her Courage to not give up,Her conviction to Stand on her principles even when everyone is against her,her ability to differentiate between Right&Wrong #Ertugrul

— Hina Parvez Butt (@hinaparvezbutt) May 13, 2020

ایک صارف موسیٰ نے حنا پرویز بٹ کے ٹویٹ پر طنزیہ جواب دیتے ہوئے لکھا کہ آپ درست کہہ رہی ہیں کیونکہ ارتغرل کی بھی لندن تو کیا اناطولیہ میں بھی کوئی جائیداد نہیں ہے۔

وسیم رضا نقوی نے لکھا کہ کیا ‏‎کوئی شہباز شریف جیسا چچا بھی ہے ارتغرل کا جو بیک ڈور “طاقتور حلقوں” کے ساتھ معاہدے بھی کرتا ہو؟

یاد رہے کہ ترکی ڈرامے نے پاکستان میں مقبولیت کے نئے ریکارڈ قائم کیے ہیں، لیکن ساتھ ہی ساتھ مختلف طبقات کی جانب سے اس پر بحث بھی چھڑ گئی ہے۔

معروف اداکارہ ریما خان کا کہنا ہے کہ اداکار شان نے غیرملکی مواد کو پاکستان ٹیلی وژن پر چلانے کے خلاف آواز بلند کی ہے، میں بھی ان کی تائید کرتی ہوں۔

انہوں نے کہا کہ ایسے وقت میں جبکہ آپ کے اپنے فنکار کام نہ ملنے کے باعث گھر بیٹھے ہوں، غیرملکی مواد نیشنل ٹی وی پر دکھانا درست نہیں ہے۔