پاکستان اگلے چند ہفتوں میں کورونا کی دوا ‘رمڈیسیویر’ کی پیداوار شروع کر دے گا

اسلام آباد: وزیراعظم عمران خان کے معاون خصوصی برائے صحت ڈاکٹر ظفر مرزا نے کہا ہے کہ کورونا وائرس کے حوالے سے اب تک کی سب سے موثر دوائی رمڈیویسویر کی تیاری چند ہفتوں میں پاکستان میں شروع ہو جائے گی۔

پریس کانفرنس سے خطاب کرتے ہوئے ان کا کہنا تھا کہ امریکہ میں کورونا مریضوں پر استعمال ہونے والی یہ دوا انجیکشن کی صورت میں دی جاتی ہے اور اس سے مرض کی شدت میں 30 فیصد کمی دیکھی گئی ہے۔

کورونا کی دوائی رمڈیسیویر کی قیمت کیا ہو گی؟

امریکی کمپنی کی دوائی جس سے کورونا کے مریض تیزی سے صحتیاب ہونے لگے

معاون خصوصی نے بتایا کہ امریکی کمپنی نے دنیا کے پانچ ممالک کو رمڈیسیویر کی تیاری کا لائسنس دیا ہے اور ان میں سے ایک پاکستان بھی ہے، وزیراعظم نے بھی دوا ساز کمپنی کے ساتھ ایک اجلاس کیا ہے۔

ڈاکٹر ظفر مرزا نے کہا کہ دوا کی رجسٹریشن 5 ہفتوں میں ہو گی جبکہ 8 ہفتوں کے دوران اس کی پیداوار شروع ہو جائے گی، بعد ازاں پاکستان اسے دیگر ممالک میں ایکسپورٹ کرنا بھی شروع کر دے گا۔

انہوں نے بتایا کہ دوا کی قیمت کم سے کم رکھنے کی کوشش کی جائے گی کیونکہ آنے والے دنوں میں کورونا مریضوں کی تعداد میں اضافے کا خدشہ ہے۔

یاد رہے کہ امریکی ادارے ایف ڈی اے نے ایبولا وائرس کے لیے تیار کی جانے والی دوا رمڈیسیویر کو کورونا مریضوں پر کامیاب کلینکل ٹرائل کے بعد استعمال کی اجازت دی تھی۔

اس وقت امریکہ میں تشویشناک حالت میں مبتلا مریضوں کو یہ دوا دی جا رہی ہے اور اس کے بہت مثبت نتائج سامنے آ رہے ہیں۔