پاکستان کی پہلی سکھ خاتون صحافی من میت کور کو برطانیہ میں ایوارڈ کے لیے نامزد کیا گیا ہے۔
پشاور کی رہائشی 25 سالہ صحافی من میت کور کو برطانیہ کے سکھ گروپ نے 30 سال سے کم عمر کے سکھوں کی 100 بااثر شخصیات میں شامل کیا ہے۔
برطانیہ میں موجود سکھ گروپ عالمی تنظیم ہے جو دنیا بھر کے مختلف ممالک میں عوام کی مختلف ذرائع سے خدمت کرنیوالی سکھ شخصیات کو ایوارڈز دیتی ہے۔
من میت کا تعلق پشاور سے ہے، انہیں اقلیتوں اور خواتین کے مسائل کو اجاگر کرنے پر مقامی سطح پر بھی ایوارڈز سے نوازا جا چکا ہے، وہ اگلے سال برطانیہ میں ایک تقریب کے دوران اپنا ایوارڈ وصول کریں گی۔
من میت کور نے دنیا بھر کی با اثر سکھ شخصیات میں اپنے نام کی نامزدگی پر خوشی کا اظہار کیا ہے۔ انہوں نے کہا کہ جو لوگ سخت محنت کرتے ہیں انہیں انعامات سے نوازا جاتا ہے اور یہ میرے لیے اعزاز کی بات ہے کہ میرا خاندان برطانیہ میں پاکستان کی نمائندگی کرے گا۔
سکھ گروپ کی جانب سے دنیا بھر کے مختلف ممالک میں سکھ مذہب سے تعلق رکھنے والے بزنس، سپورٹس، چیرٹی، میڈیا، انٹر ٹینمنٹ، تعلیم، رضا کارانہ سرگرمیوں کے شعبہ میں کام کرنیوالی شخصیات کو ایوارڈز کے لیے نامزد کیا جاتا ہے۔
اسی طرح بین الامذاہب ہم آہنگی کے لیے کام کرنیوالی دوسرے مذاہب کی شخصیات کو لائف ٹائم اچیومنٹ اور خصوصی خدمات کے اعتراف میں ایوارڈز کے لیے نامزد کیا جاتا ہے۔
