اسرائیل میں چینی سفیر ڈو وی تل ابیب میں اپنی رہائش گاہ پر مردہ پائے گئے، ان کی موت کی وجوہات معلوم نہیں ہو سکیں۔
پولیس ترجمان مکی روزن فلڈ نے تصدیق کی ہے کہ ڈو وی کو ان کے اسٹاف نے صبح کے وقت اپنی رہائش گاہ پر مردہ پایا، میڈیا رپورٹس کے مطابق بظاہر ان کی موت حرکت قلب بند ہونے کے باعث ہوئی ہے تاہم اس کی سرکاری طور پر تصدیق نہیں ہو سکی۔
اسرائیلی وزارت خارجہ کے ڈائرکٹر جنرل یوال روٹم نے بتایا ہے کہ انہوں نے چین کے نائب سفیر کو تعزیت کے لیے فون کیا ہے اور انہیں ہر ممکن تعاون کی یقین دہانی کرائی ہے۔
چینی سفیر ڈو فروری میں اسرائیل آئے تھے، اس سے قبل وہ یوکرین میں تعینات تھے، ان کے پسماندگان میں بیوہ اور ایک بیٹا شامل ہیں جو اس وقت اسرائیل میں نہیں ہیں۔
یاد رہے کہ اسرائیل کے چین کے ساتھ دوستانہ تعلقات ہیں، دو روز قبل ڈو وی نے امریکی سیکرٹری آف سٹیٹ مائیک پومپیو کی اس گفتگو کی مذمت کی تھی جس میں انہوں نے چین پر کورونا وبا کے متعلق معلومات چھپانے کا الزام لگایا تھا۔
