اوبامہ کی ٹرمپ انتظامیہ پر تنقید کا جواب دینے کے لیے امریکی صدر بھی میدان میں آ گئے اور انہوں نے سابق صدر کو سخت نااہل قرار دے دیا۔
سابق امریکی صدر باراک اوبامہ نے گزشتہ دنوں کالج سے گریجویٹ کرنے والے طلبہ سے آن لائن خطاب میں کہا تھا کہ اس وبا نے ثابت کر دیا ہے کہ موجودہ انتظامیہ کے سربراہان اور حتیٰ کہ انچارج ہونے کا بہانہ یا ڈرامہ بھی نہیں کر رہے۔
ان کا کہنا تھا کہ اس وبا نے ملکی قیادت کی ناکامیوں کو عیاں کر دیا ہے اور اس بات سے بھی پردہ اٹھ گیا ہے کہ اکثر افراد یہ بھی نہیں جانتے کہ وہ کیا کر رہے ہیں۔
کیا ٹرمپ انتخابات میں کورونا کے بہانے چین کو قربانی کا بکرا بنانے جا رہے ہیں؟
کورونا وبا سے چین میں امریکہ سے زیادہ اموات ہوئی ہیں، صدر ٹرمپ کا دعویٰ
اس کے جواب میں صدر ٹرمپ نے وائٹ ہاؤس پہنچنے کے بعد کہا کہ دیکھیں! وہ ایک نااہل صدر تھا، میں بس اتنا کہہ سکتا ہوں کہ سخت نااہل۔۔
بعد ازاں انہوں نے ایک ٹویٹ میں اوبامہ انتظامیہ کو امریکی تاریخ کی سب سے نااہل اور کرپٹ انتظامیہ قرار دیا۔
یاد رہے کہ رواں ماہ کے اوائل میں باراک اوبامہ نے کورونا وبا سے نمٹنے کی صدر ٹرمپ کی حکمت عملی کو انتشار سے بھرپور اور تباہ کن قرار دیا تھا۔
انہوں نے کہا تھا کہ اس صورتحال سے امریکہ میں جس طرح نمٹا گیا ہے وہ ہمیں یاددہانی کراتا ہے کہ عالمی بحران سے نمٹنے کے لیے ملک کو مضبوط قیادت کی ضرورت ہوتی ہے۔
اس وقت تک 15 لاکھ کے قریب امریکی کورونا وائرس سے متاثر ہو چکے ہیں جبکہ اموات کی تعداد 90 ہزار کو چھو رہی ہے، دنیا میں امریکہ سب سے زیادہ متاثرہ ملک بن چکا ہے۔
نقاد ٹرمپ انتظامیہ پر کورونا وائرس کو آغاز میں اسے زیادہ اہمیت نہ دینے اور اسے نظرانداز کرنے کے الزامات لگاتے ہیں، ان کا کہنا ہے کہ شروع میں حکومت نے غفلت اور سستی کا مظاہرہ کیا جس کے باعث وائرس کو پھیلنے کا موقع مل گیا۔
