بھارت کے علاقہ جونا گڑھ میں 5 چور ریسٹورنٹ کے تالے توڑ کر داخل ہوئے، کھانا بنایا اور اسے کھانے کے بعد بغیر کچھ چوری کیے روانہ ہو گئے۔
سی سی ٹی وی فوٹیج میں دیکھا جا سکتا ہے کہ ریسٹورنٹ میں داخل ہونیوالے چوروں نے چاول کے ساتھ آلو کری بنائی جسے کھانے کے بعد وہ بغیر کچھ چوری کیے وہاں سے نکل گئے۔
گجانند پراٹھا ہاؤس ریسٹورنٹ کے مالک جتیش تنک نے ٹائمز آف انڈیا کو بتایا کہ ان کے ریسٹورنٹ کے نزدیک آفس کے مالک نے انہیں کال کر کے بتایا کہ ریسٹورنٹ کا دروازہ کھلا ہے۔ کچن میں داخل ہوتے وقت معلوم ہوا کہ وہاں پر 5 استعمال شدہ پلیٹیں پڑی ہیں جبکہ کھانا پکانے کے لیے برتن بھی استعمال کیے گئے۔ ان کا کہنا تھا کہ اس سے لگتا تھا کہ چوروں نے کھانے کے لیے چاول اور آلو کری تیار کی تھی۔
تنک کی جانب سے ویڈیو سوشل میڈیا پر پوسٹ ہونے کے بعد مقامی پولیس واقعہ کی رپورٹ کے لیے ریسٹورنٹ پہنچ گئی۔
بھارت میں پیر کے روز کورونا وائرس کے 5242 نئے کیسز رپورٹ ہوئے، اب تک کورونا کی وجہ سے 3155 اموات واقع ہو چکی ہیں جبکہ متاثر ہونیوالوں کی تعداد 96 ہزار تک پہنچ چکی ہے جو ایشیاء میں سب سے زیادہ ہے۔ صرف ممبئی شہر ملک کے کل متاثرہ افراد کا 20 فیصد ہے۔
اتوار کے روز وفاقی حکومت نے ملک میں لاک ڈاؤن کی مدت 31مئی تک بڑھا دی ہے جبکہ کچھ کاروبار کھولنے کی اجازت دیدی گئی ہے۔
