سابق آل راؤنڈر شاہد خان آفریدی نے کہا ہے کہ وزیراعظم عمران خان کی ٹیم خیبرپختونخوا میں کارکردگی نہیں دکھا سکی۔
ان کا کہنا تھا کہ پاکستان تحریک انصاف سات برسوں سے اس صوبے میں حکمران ہے لیکن عمران خان کے ویژن کے مطابق وہاں کام نہیں ہوا۔
سیاست میں آنے کے متعلق انہوں نے کہا کہ مجھے بہت سی جماعتوں کی جانب سے پیشکش ہوئی ہے، اگر ایسا ارادہ ہوتا تو اب تک سیاست میں آ چکا ہوتا، یہ سیاست دانوں کا کام ہے، انہی کو ہی کرنے دینا چاہیئے۔
ان سے سوال پوچھا گیا کہ اگر انہیں سات ماہ کے لیے وزیراعظم بنا دیا جائے تو اس عرصے میں ان کی ترجیحات کیا ہوں گی، انہوں نے جواب دیا کہ تعلیم اور روزگار پر ان کا فوکس ہو گا۔
ہم نیوز کے اینکر عادل شاہزیب نے انہیں کہا کہ سیاست میں جانے کا موقع ملے تو اس سے فائدہ اٹھانے میں کیا حرج ہے؟ اس پر شاہد آفریدی کا کہنا تھا کہ وزیراعظم کی کرسی مذاق نہیں ہے، اس پر بیٹھنا بہت دشوار کام ہے۔
انہوں نے کہا کہ اگر وہ وزیراعظم ہوتے تو حزب اختلاف کی جماعتوں کو ساتھ لے کر چلتے کیونکہ جو شخص گھر کا بڑا ہوتا ہے وہ باقی افراد خانہ کو بھی ساتھ لے کر چلتا ہے۔
شاہد آفریدی کا کہنا تھا کہ خیبرپختونخوا میں پولیس اور صحت کے محکمے بہتر ہوئے ہیں لیکن انفراسٹرکچر میں بہتری لانے کی ضرورت ہے تاکہ لوگوں کا کام چل سکے۔
