امریکی صدر ڈونلڈ ٹرمپ نے کہا ہے کہ ہم سوشل میڈیا کمپنیوں کو یا ریگولیٹ کریں گے یا انہیں یکسر بند کر دیں گے۔
ٹویٹر کی جانب سے صدر ٹرمپ کی چند ٹویٹس پر تنبیہ کرنے کے بعد انہوں نے ردعمل دیتے ہوئے کہا ہے کہ ریپبلکن پارٹی کے حامیوں کو محسوس ہو رہا ہے کہ سوشل میڈیا پلیٹ فارمز نے کنزرویٹو آوازوں کو پوری طرح بند کر دیا ہے۔
اپنے ٹویٹ میں ان کا کہنا تھا کہ ہم ایسا کرنے کی اجازت دینے سے پہلے انہیں (سوشل میڈیا کمپنیوں کو) یا تو ریگولیٹ کریں گے یا پھر انہیں بند کر دیں گے۔
کیا ٹرمپ انتخابات میں کورونا کے بہانے چین کو قربانی کا بکرا بنانے جا رہے ہیں؟
کورونا وبا کے خاتمے پر چین اور امریکہ کے درمیان سرد جنگ کے خطرات لہرانے لگے
صدر ٹرمپ نے کہا کہ ہم نے دیکھا ہے کہ انہوں نے کیا کرنے کی کوشش کی ہے جس میں وہ ناکام ہوئے ہیں، ہم انہیں اسے مزید نفاست سے استعمال نہیں کرنے دیں گے۔
انہوں نے سوشل میڈیا کمپنیوں کو سختی سے مخاطب ہو کر کہا کہ آپ اپنا طریق کار ابھی تبدیل کریں۔
یاد رہے کہ گزشتہ روز ٹویٹر نے صدر ڈونلڈ ٹرمپ کی ٹویٹس پر ‘فیکٹ چیک لیبل’ لگا دیا تھا، یہ لیبل غلط خبریں دینے اور غیرمصدقہ دعووں کا مقابلہ کرنے کے لیے بنایا تھا۔
اس کے فوراً بعد ٹرمپ نے ایک ٹویٹ کیا جس میں انہوں نے الزام عائد کیا کہ کمپنی 2020 کے صدارتی انتخابات میں مداخلت کر رہی ہے اور آزادی اظہار کا گلہ گھونٹ رہی ہے۔
انہوں نے کہا کہ وہ ٹویٹر انتظامیہ کو ایسا کرنے کی اجازت نہیں دیں گے۔
