سخت ترین لاک ڈاؤن اور دیگر حکومتی اقدامات کے باوجود بھارت میں کورونا وبا کی شدت بڑھتی جا رہی ہے، گزشتہ 24 گھنٹوں میں 8 ہزار کے قریب افراد میں کورونا کی تصدیق کے بعد مصدقہ کیسز کی تعداد ایک لاکھ 73 ہزار 763 ہو گئی ہے۔
بھارت میں ایک ہی روز میں کورونا مریضوں کی یہ سب سے بڑی تعداد ہے جو وبا کے پھیلاؤ کی نشاندہی کر رہی ہے، گزشتہ 24 گھنٹوں میں 265 افراد موت کا شکار ہوئے جس کے بعد بھارت نے 4 ہزار 971 اموات کے ساتھ چین کو پیچھے چھوڑ دیا ہے۔
مصدقہ کیسز کے حوالے سے دیکھا جائے تو بھارت ترکی سے آگے بڑھ گیا ہے جہاں کورونا کے ایک لاکھ 65 ہزار 799 مریض سامنے آ چکے ہیں، اب تک 82 ہزار 370 افراد اس وائرس سے صحتیاب ہو چکے ہیں۔
جان ہاپکنز یونیورسٹی کے مطابق مریضوں کی تعداد کے لحاظ سے بھارت کورونا سے متاثرہ ممالک کی فہرست میں 9 ویں درجے پر آ گیا ہے، امریکہ، برازیل، روس، برطانیہ، اسپین، اٹلی، فرانس اور جرمنی اس وقت سب سے زیادہ متاثرہ ممالک ہیں۔
