وزیراعظم عمران خان کی زیرصدارت ہونے والا قومی رابطہ کمیٹی کا اجلاس کل تک ملتوی ہو گیا ہے، لاک ڈاؤن میں نرمی یا مزید سختی کا فیصلہ کل ہو گا۔
ذرائع کے مطابق یہ اجلاس کل سہہ پہر ساڑھے 4 بجے ہو گا جس میں چاروں صوبائے وزرائے اعلیٰ، وفاقی وزراء، این ڈی ایم اے اور صحت کے حکام شریک ہوں گے۔
اجلاس میں سب سے اہم معاملہ لاک ڈاؤن کے متعلق پالیسی کا ہو گا، پاکستان میں کورونا وبا کے پھیلاؤ میں شدت آ رہی ہے جس کے باعث لاک ڈاؤن کے متعلق کوئی فیصلہ متوقع ہے۔
گزشتہ روز وزیراعظم کے معاون خصوصی برائے صحت ڈاکٹر ظفر مرزا نے ملک بھر میں ماسک لازمی قرار دینے کا اعلان کیا تھا۔
عید الفطر کے موقع پر جس طرح عوام نے حکومتی ہدایات نظرانداز کر دی ہیں اس کے بعد صحت سے متعلقہ ماہرین نے کورونا وبا میں شدت کے اندیشے کا اظہار کیا تھا جو درست ثابت ہو رہا ہے۔
اس سے قبل 7 مئی کو رابطہ کمیٹی کا اجلاس ہوا تھا جس میں 9 مئی سے لاک ڈاؤن میں کمی کرنے کا فیصلہ کیا تھا، بعد ازاں سپریم کورٹ نے بھی عید کے موقع پر تمام شاپنگ مالز اور کاروبار پورا ہفتہ کھولنے کا حکم دیا تھا۔
اس وقت تک پاکستان میں کورونا مریضوں کی تعداد 71 ہزار کے قریب پہنچ گئی ہے جبکہ 1519 افراد جاں بحق ہو چکے ہیں، سب سے زیادہ مریض سندھ سے سامنے آ رہے ہیں جہاں 28 ہزار سے زائد افراد کورونا میں مبتلا ہو چکے ہیں۔
