کراچی: پاکستان کے سب سے بڑے شہر کراچی میں کورونا کا پھیلاؤ سب سے زیادہ شدید ہے، دنیا کے دیگر گنجان آباد شہروں کی طرح عروس البلاد میں بھی کورونا وائرس تیزی سے پھیل چکا ہے۔
محکمہ صحت سندھ کے مطابق گزشتہ 24 گھنٹوں کے درمیان روشنیوں کے شہر میں 35 افراد جاں بحق ہو گئے، وبا کے ہاتھوں ایک ہی دن میں جاں بحق ہونے والوں کی یہ ریکارڈ تعداد ہے، شہر میں کورونا مریضوں کی تعداد 21 ہزار 870 تک پہنچ گئی ہے۔
گزشتہ 24 گھنٹوں میں کراچی میں ایک ہزار 43 افراد میں کورونا وائرس کی تصدیق ہوئی ہے، مجموعی طور پر شہر میں اموات کی تعداد 388 ہو گئی ہے۔
محکمہ صحت سندھ کے مطابق سکھر،حیدرآباد اورٹھٹھہ میں بھی کورونا سے ایک ایک مریض جاں بحق ہو گیا ہے، صوبہ سندھ میں 24 گھنٹے کے دوران 38 اموات ہوئی ہیں۔
سندھ میں کورونا کے باعث ہونے والی اموات کی تعداد 465 ہو گئی ہے جبکہ کورونا کیسز 27 ہزار سے تجاوز کر گئے ہیں۔
محکمہ صحت سندھ کا کہنا ہے کہ صوبے بھر میں کورونا کے مصدقہ مریضوں کی تعداد 27 ہزار 360 ہو چکی ہے۔
