کورونا وائرس : جی سیون سمٹ ملتوی، صدر ٹرمپ کا نئے ممالک کی شمولیت کا عندیہ

دنیا بھر میں کورونا وائرس کی شدت مسلسل جاری ہیں اور اس سے متاثرہ افراد کی تعداد 60 لاکھ سے تجاوز کر چکی ہے۔

جانز ہاپکنز یونیورسٹی کے اعدادوشمار کے مطابق اس وقت کورونا وائرس سے متاثرہ افراد کی مجموعی تعداد 60 لاکھ 59 ہزار ہے جن میں سے 17 لاکھ سے زائد متاثرہ افراد امریکہ میں ہیں جبکہ دنیا بھر میں اموات کی تعداد 3 لاکھ 70 ہزار ہو گئی ہے۔

کورونا کے بڑھتے ہوئے پھیلاؤ کے باعث امریکی صدر ڈونلڈ ٹرمپ نے G7 سمٹ کو بھی منسوخ کرتے ہوئے گروپ میں مزید ممالک کو شامل کرنے کا عندیہ بھی دیا ہے۔ آئندہ اجلاس ستمبر میں متوقع ہے۔

ٹرمپ کا کہنا تھا کہ وہ جون میں ہونے والے  گروپ آف سیون سمٹ کو ملتوی کر رہے ہیں جبکہ وہ گروپ کے ممالک کی فہرست میں اضافہ کرنا چاہتے ہیں اور اس سلسلہ میں وہ  آسٹریلیا، روس، جنوبی کوریا اور بھارت کو دعوت دینے کا ارادہ رکھتے ہیں۔

انھوں نے مزید کہا کہ میں یہ سمٹ اس لیے ملتوی کر رہا ہوں کیونکہ میں سمجھتا ہوں کہ آج کے منظرنامہ میں  موجودہ گروپ ان کی صحیح نمائندگی نہیں کرتا۔ آج کے فارمیٹ میں یہ بہت پرانے ممالک کا گروپ ہے۔

واضح رہے کہ G7 سات ممالک پر مشتمل ایک گروپ ہے جس میں امریکہ ، اٹلی، فرانس، برطانیہ ، جاپان، جرمنی اور کینیڈا شامل ہیں۔ اس کے علاوہ یورپی یونین بھی اس گروپ کا حصہ ہے۔