پشاور: خیبرپختونخوا میں تقریباً ڈھائی ماہ بند رہنے کے بعد سرکاری یونیورسٹیاں کھل گئی ہیں۔
خیبرپختونخوا ریلیف اینڈ سیٹلمنٹ ڈپارٹمنٹ نے ایک نوٹیفکیشن کے ذریعے سرکاری یونیورسٹیوں کے وائس چانسلرز، تمام شعبوں کے ڈین، ہیڈ آف ڈیپارٹمنٹ اور دیگر انتظامی اسٹاف کو ہدایت کی ہے کہ وہ یکم جون سے یونیورسٹیوں میں موجود رہیں تاکہ طلبہ کے لیے آن لائن کلاسز شروع کی جا سکیں۔
کورونا وائرس کے باعث دنیا کے تعلیمی نظام کی تشکیل نو ہو رہی ہے
چینی بچوں کو اسکول میں داخل ہوتے وقت کن احتیاطی تدابیر سے گزرنا پڑتا ہے؟
کورونا وبا کے دوران پاکستانیوں نے گوگل پر کیا سرچ کیا؟
کورونا وائرس کی وبا پھیلنے کے باعث یونیورسٹی آف پشاور، زرعی یونیورسٹی پشاور، یونیورسٹی آف انجینرنگ اینڈ ٹیکنالوجی پشاور، اسلامیہ کالج یونیورسٹی پشاور اور دیگر سرکاری یونیورسٹیوں کو مارچ کے وسط میں بند کر دیا گیا تھا۔
یونیورسٹی آف پشاور کے پبلک ریلیشن آفیسر علی عمران بنگش نے ایکسپریس ٹریبیون سے گفتگو کرتے ہوئے کہا کہ کورونا وبا کے متعلق حکومت کی جانب سے طے کردہ ضابطہ کار کے مطابق یونیورسٹی کھولی جائے گی اور تمام احتیاطی تدابیر اختیار کی جائیں گی۔
انہوں نے بتایا کہ یونیورسٹی آف پشاور ایک آن لائن کلاسز کے لیے سافٹ ویئر تیار کر لیا ہے، تمام اساتذہ کو اس کے استعمال کی تربیت دی گئی ہے جبکہ طلبہ اور فیکلٹی ممبرز کے اکاؤنٹس بھی سافٹ ویئر پر تیار کر لیے گئے ہیں۔
خیبرپختونخوا میں شامل ہونے والے سابقہ فاٹا کے علاقوں میں انٹرنیٹ کے مسائل پر ان کا کہنا تھا کہ یہ کلاسز یونیورسٹی کی ویب سائیٹ پر موجود ہوں گی، تمام نوٹس بھی ویب سائیٹ سے حاصل کیے جا سکتے ہیں، طلبہ اپنی مرضی کے وقت اور سہولت کے مطابق ان سے فائدہ اٹھا سکتے ہیں۔
