سینیٹر مولا بخش چانڈیو بھی کورونا وائرس کا شکار ہو گئے

پاکستان پیپلزپارٹی کے رہنما مولا بخش چانڈیو کورونا مرض میں مبتلا ہو گئے ہیں جبکہ ان کی اہلیہ اور بیٹے کا ٹیسٹ بھی مثبت آیا ہے۔

ان کا کہنا ہے کہ ان کا پہلا ٹیسٹ منفی جبکہ دوسرا مثبت آیا ہے، وہ اس وقت گھر میں قرنطینہ میں ہیں۔

سندھ میں کورونا وبا: صوبائی وزیر حاجی غلام مرتضیٰ انتقال کر گئے

مولا بخش چانڈیو نے کہا کہ وہ اپنے کمرے میں اکیلے کتب پڑھ رہے ہیں، ان کی طبیعت بالکل ٹھیک ہے۔

اس سے قبل سندھ کے وزیرتعلیم سعید غنی، گورنر سندھ عمران اسماعیل بھی کورونا میں مبتلا ہونےکے بعد صحتیاب ہو گئے ہیں۔

سندھ اسمبلی کے آٹھ اراکین کورونا میں مبتلا ہوئے ہیں، جن میں 3 صحتیاب ہو چکے ہیں جبکہ صوبائی وزیر برائے کچی آبادی غلام مرتضیٰ کا اس بیماری سے انتقال ہو گیا ہے۔

اس وقت سندھ میں کورونا مریضوں کی تعداد 31 ہزار سے زائد ہو چکی ہے جبکہ 536 افراد اس وبا کے ہاتھوں جان سے جا چکے ہیں۔

کراچی پاکستان کا سب سے زیادہ متاثرہ علاقہ ہے جہاں کورونا وائرس کے بیشتر مریض سامنے آ رہے ہیں۔