مغربی دنیا کو لاک ڈاؤن کا تصور دینے والے سائنسدان نے اسے بے فائدہ قرار دے دیا

دنیا کے سامنے لاک ڈاؤن کا تصور پیش کرنے والے برطانوی سائنسدان نیل فرگوسن نے اعتراف کیا ہے کہ برطانیہ میں لاک ڈاؤن سے سویڈن کے مقابلے میں بہتری نظر نہیں آئی۔

سویڈن کی حکومت نے ابھی تک لاک ڈاؤن نہیں کیا اور وہاں صرف سماجی فاصلے اور احتیاطی تدابیر کے ساتھ ساتھ ہرڈ ایمیونٹی بھی حاصل کرنے کی کوشش کی جا رہی ہے۔

سویڈن کا 20 فیصد آبادی میں کورونا کے خلاف قوت مدافعت پیدا ہونے کا دعویٰ

کورونا وباء کے حوالے سے سویڈن کی حکمت عملی نے دنیا کو حیران کردیا

‘پروفیسر لاک ڈاؤن’ کے نام سے معروف سائنسدان نے برطانوی ہاؤس آف لاڈرز کی سائنس و ٹیکنالوجی کی کمیٹی کے سامنے بیان دیا ہے کہ سویڈن کے سائنسدانوں نے پالیسی کی سطح پر مختلف فیصلے کیے جن سے مجھے اتفاق نہیں ہے لیکن سائنسی طور پر وہ دنیا کے دیگر حصوں کے سائنسدانوں سے دور نہیں ہیں۔

اسی نشست میں انہوں نے اعتراف کیا کہ سویڈن کے حکام نے لاک ڈاؤن کے بغیر بھی وہی نتائج حاصل کیے ہیں جن تک ہم پہنچے ہیں۔

نیل فرگوسن ہی وہ شخص ہیں جنہوں نے برطانوی وزیراعظم بورس جانسن کو لاک ڈاؤن پر قائل کیا تھا جس کے باعث برطانوی معیشت ٹھٹھر کر رہ گئی، وہی سائنسدان اب یہ کہہ رہے ہیں سویڈن لاک ڈاؤن کے بغیر اسی مقام پر کھڑا ہے جہاں برطانیہ موجود ہے۔

معروف کالم نگار جیسن او ٹول کا کہنا ہے کہ برطانیہ میں سخت ترین لاک ڈاؤن کے دوران ہر 10 لاکھ برطانویوں میں سے 579 افراد کورونا سے ہلاک ہوئے ہیں جبکہ سویڈن میں بغیر لاک ڈاؤن کے یہ شرح 10 لاکھ میں 442 اموات ہیں۔

سائنسی موضوعات پر لکھنے والے آئرش صحافی پیٹر اینڈریوز اس موضوع پر لکھتے ہیں کہ ہم سے توقع کی جاتی تھی کہ ہم سائنس کی پیروی کریں لیکن اب سائنسدان اچھل اچھل کر اعتراف کر رہے ہیں کہ ہم نے کورونا وبا کو درست انداز میں نہیں سمجھا تھا۔

ان کا کہنا ہے کہ نیل فرگوسن نے ہاؤس آف لارڈز کی کمیٹی کے سامنے جو کچھ کہا ہے اس کا سادہ مطلب یہ ہے کہ برطانوی لاک ڈاؤن بے معنی تھا اور سویڈن کا ماڈل زیادہ کامیاب ہے۔

یاد رہے کہ نیل فرگوسن برطانیہ کے مانے ہوئے ماہر برائے وبائی امراض ہیں اور سب سے پہلے انہوں نے کورونا کے کامیابی کے لیے لاک ڈاؤن کا تصور پیش کیا تھا۔