پاکستان تحریک انصاف کی وزیر ماحولیات زرتاج گل کی کورونا کی عجیب و غریب تشریح کی بازگشت ابھی سوشل میڈیا پر ختم نہیں ہوئی تھی کہ ایک اور حکومت رکن قومی اسمبلی ریاض فتیانہ نے کورونا سے تحفظ کے لیے ٹڈی دل کھانے پر تحقیق کی تجویز پیش کر دی۔
قومی اسمبلی میں تقریر کرتے ہوئے انہوں نے کہا کہ ایک عام مفروضہ ہے کہ اگر ٹڈی دل کو کھایا جائے تو کورونا وائرس کا دفاع کیا جا سکتا ہے۔
انہوں نے تجویز پیش کی کہ اگر اس پر تحقیق کرا لی جائے اور یہ ثابت ہو جائے کہ ٹڈی دل کھانے سے کورونا وائرس کے خلاف مضبوط قوت مدافعت پیدا ہوتی ہے تو پاکستانی قوم خود ہی اس کا تیا پانچہ کردے گی، حکومت کو زیادہ محنت نہیں کرنی پڑے گی۔
ان کی اس گفتگو پر ایوان میں بیٹھے کئی اراکین کے چہروں پر مسکراہٹ آ گئی اور سوشل میڈیا پر ان کا یہ کلپ وائرل ہو گیا ہے۔
