جسٹس قاضی فائز عیسیٰ کی اہلیہ نے شوہر کو قتل کرنے کی دھمکی پر ایف آئی آر کے لیے درخواست جمع کرا دی۔
تفصیلات کے مطابق جسٹس قاضی فائز عیسیٰ کی اہلیہ سرینا عیسیٰ نے تھانہ سیکرٹریٹ میں درخواست جمع کرائی ہے جس میں ایک شیعہ ذاکر کے خطاب کا حوالہ دیا گیا ہے جنہیں یہ کہتے ہوئے سنا جا سکتا ہے کہ جو آدمی بھی غبن میں پکڑا جائے، چاہے وہ فائز عیسیٰ ہو۔۔۔ سیدھا فائرنگ اسکواڈ کے سامنے کھڑا کر دیا جائے۔
درخواست کے ساتھ ایک یو ایس بی بھی جمع کرائی گئی ہے جس میں ذاکر کا بیان شامل ہے اور جسٹس قاضی فائز عیسیٰ کی اہلیہ کے مطابق اس کا نام افتخار الدین مرزا ہے تاہم انہیں معلوم نہیں کہ یہ انکا اصل نام ہے۔
سرینا نے اس دھمکی کو ان کے شوہر کے خلاف سازشوں کا سلسلہ قرار دیا ہے۔ اپنی درخواست میں انہوں نے لکھا کہ سپریم کورٹ کے جج کو قتل کرنے کی دھمکی دہشتگردی کی بدترین قسم ہے اور طاقتور حلقے میرے شوہر سے جان چھڑانا چاہتے ہیں۔
واضح رہے گزشتہ ہفتے سپریم کورٹ کے دس رکنی فل کورٹ بینچ نے جسٹس عیسیٰ کے خلاف صدارتی ریفرنس کالعدم قرار دیا تھا اورمعاملہ ایف بی آر کے سپرد کر کے انکوائری کا حکم دیا تھا۔
