سندھ کے وزیراعلیٰ سید مراد علی شاہ نے انکشاف کیا ہے کہ معروف علمائے دین مفتی نعیم ، طالب جوہری اور جماعت اسلامی کے سابق امیر سید منور حسن بھی کورونا کا شکار ہوئے ہیں۔
سندھ اسمبلی سے خطاب کرتے ہوئے انہوں نے بتایا کہ صوبہ بھر میں سب سے زیادہ ٹیسٹ ہوئے ہیں، 75 ہزار 168 افراد کورونا سے متاثر ہوئے ہیں جبکہ 54 فیصد مریض صحتیاب ہو چکے ہیں۔
انہوں نے کہا کہ سندھ میں کورونا وائرس سے ڈیڑھ فیصد اموات ہوئی ہیں، اس وبا سے جاں بحق ہونے والوں کی سب سے زیادہ شرح بلوچستان میں ہے۔
وزیراعلیٰ سندھ کا کہنا تھا کہ سندھ میں پچھلے کچھ دنوں سے کورونا ٹیسٹ کم ہورہے ہیں، اس کی وجہ طبی عملے کا بیمار ہونا اور دیگرعوامل ہیں، جب کورونا آیا تو اس وقت روزانہ 80 ٹیسٹ کرنے کی استعداد تھی لیکن آج ہم 14 ہزار ٹیسٹ کر رہے ہیں۔
وزیراعظم عمران خان پر تنقید کرتے ہوئے انہوں نے کہا کہ کل وزیراعظم نے کہا 13 مارچ کو لاک ڈاوَن ہو گیا تھا حالانکہ 22 مارچ کو انہوں نے تقریر میں کہا تھا کہ لاک ڈاوَن نہیں ہونا چاہیے تھا۔ وہ کہتے ہیں کہ ہم نے اسمارٹ لاک ڈاوَن کیے جبکہ لاہور تو پورا بند ہے۔
سندھ میں لوڈ شیڈنگ کے متعلق انہوں نے کہا کہ کے الیکٹرک کے مطابق انہیں گیس اور فرنس آئل نہیں مل رہا، پی ایس او اور سوئی سدرن کہتے ہیں کہ گیس اور فرنس آئل فراہم کررہے ہیں۔ یہ تینوں محکمے وفاق کے ہیں لیکن وزیراعظم اور وفاقی وزیر خاموش ہیں۔
انہوں نے مزید کہا کہ کے الیکٹرک کا کراچی کے ساتھ جو سلوک آج ہے وہ سندھ کے دیہی علاقوں کے ساتھ پہلے سے ہورہا ہے،مرادعلی شاہ
سید مراد علی شاہ کا کہنا تھا کہ حکومت نے پٹرول سستا کیا لیکن عوام کو دے نہ سکے، ایوان میں کچھ باتیں کی گئیں جو مجھے نامناسب لگیں، میں بھی کچھ باتیں کروں گا وہ برداشت کرنے کی ہمت رکھیے گا۔
