کورونا وائرس ایک طرف انسانی جانوں کا شکار کر رہی ہے تو دوسری جانب پوری دنیا کی معیشت اس کے حملے سے نڈھال ہو چکی ہے۔ بیروزگاری نے نئے ریکارڈ قائم کر دیے ہیں جبکہ بڑی بڑی کمپنیاں دیوالیہ ہونے کے قریب پہنچ گئی ہیں۔
تام چند افراد ایسے ہیں جن کے پاس پہلے ہی دولت کے انبار جمع تھے اور کورونا وبا نے اس میں مزید اضافہ کیا ہے، دنیا کے 10 امیر ترین افراد کی آمدنی میں ایک ہی ہفتے کے دوران اربوں ڈالرز کا اضافہ ہوا ہے۔
1 جون سے لے کر 25 جون کے دورانیے میں ان افراد نے 23 ارب ڈالرز مزید کما لیے ہیں۔
بھارت کی 10 شخصیات جو اپنے ورثا کیلئے بے پناہ دولت چھوڑ کر اس دنیا سے رخصت ہوئیں
جیف بیزوس
دنیا کا امیر ترین شخص جیف بیزوس ہیں جو ایمازون کمپنی کے مالک ہیں، فروری سے لے کر 25 جون تک ان کی دولت میں 50 ارب ڈالر کا اضافہ ہو چکا ہے۔
صرف رواں ہفتے میں ان کی مجموعی دولت میں 5 ارب 60 کروڑ ڈالر کا اضافہ ہوا ہے جس کے بعد وہ 164 ارب 50 کروڑ ڈالر کے مالک بن گئے ہیں۔
رواں ہفتے اسٹاک مارکیٹ میں ایمازون کے شیئرز میں 4 فیصد اضافہ ہوا ہے جو ایک نیا ریکارڈ ہے۔
میکنزی بیزوس
جیف بیزوس کی سابق اہلیہ میکنزی بھی ایمازون میں 4 فیصد شیئر کی مالک ہونے کے باعث مزید امیر ہو گئی ہیں، ان کی دولت رواں ہفتے 2 ارب ڈالر کے اضافے کے ساتھ 53.9 ارب ڈالر ہو گئی ہے۔ وہ دنیا کی امیر ترین خواتین میں اب دوسرے نمبر پر آ گئی ہیں۔
ما ہواتنگ
ٹینسینٹ کمپنی کے چیئرمین ما ہواتنگ نے اس ہفتے 3.4 ارب ڈالر مزید کما لیے ہیں اور وہ مجموعی طور پر 54 ارب 60 کروڑ ڈالرز کے مالک ہو گئے ہیں۔
وہ علی بابا گروپ کے بانی جیک ما سے بھی آگے بڑھ گئے ہیں جن کی دولت اس وقت 24 کروڑ 40 لاکھ ڈالر کمی کے بعد 44 ارب 30 کروڑ ڈالر ہو گئی ہے۔
سلیمان کریموف
روسی سرمایہ کار سلیمان کریموف کی دولت میں ایک ارب 30 کروڑ ڈالر کا اضافے کے بعد 16 ارب 70 کروڑ ڈالر ہو گئی ہے، وہ اور ان کا خاندان روس میں سونے کی پیداوار کے حوالے سے سب سے بڑی کمپنی پولیئس میں 78 فیصد شیئرز کے مالک ہیں۔
برنارڈ آرنالٹ اور مائیکل ڈیل
برنارڈ آرنالٹ ایک ارب 70 کروڑ ڈالر اضافے کے ساتھ 104 ارب 10 کروڑ ڈالر اور ٹیکنالوجی کا بڑا نام مائیکل ڈیل ایک ارب 60 کروڑ ڈالر کے اضافے کے ساتھ 31 ارب 60 کروڑ ڈالر کے مالک بن گئے ہیں۔
مکیش انبانی اور دیگر امیرترین افراد
ان کے علاوہ بھارت کے مکیش انبانی 3 ارب 70 کروڑ ڈالر اضافے کے بعد 63 ارب 50 کروڑ ڈالر، چینی کولن ژنگ ہانگ ایک ارب 90 کروڑ ڈالر اضافے کے ساتھ 44 ارب 60 کروڑ ڈالر، چین کے ولیم لی ڈنگ ایک ارب 60 کروڑ ڈالر اضافے کے بعد 26 ارب 70 کروڑ ڈالر اور چین ہی کے ینگ لن کن ایک ارب 40 کروڑ ڈالر اضافے کے بعد 33 ارب 50 کروڑ ڈالر کے مالک بن گئے ہیں۔
