وفاقی وزیر ریلوے شیخ رشید نے کہا ہے کہ ہم نہ ہی آخری چوائس ہیں اور نہ ہی مائنس ون ہوں گے لیکن اگر بات مائنس ون کی آئی تو پھر مائنس تھری ہو گا۔
لاہور میں میڈیا سے گفتگو کرتے ہوئے انہوں نے کہا کہ پاکستان تحریک انصاف کے رہنماؤں کو میڈیا پر گندے کپڑے نہیں دھونے چاہئیں، بدقسمتی ہے کہ وزرا اپوزیشن کا کردار ادا کر رہے ہیں۔
ان کا کہنا تھا کہ اپوزیشن عمران خان کا کچھ نہیں بگاڑ سکتی، ان کی دونوں جماعتیں رنگے ہاتھوں پکڑی گئی ہیں، وزیراعظم بہت محنت کررہے ہیں۔
شیخ رشید نے کہا کہ میں نوازشریف کے جانے کی بات کرتا تھا اس کا مطلب تھا کہ وہ جائیں گے، چودھری برادران نوازلیگ کی طرف نہیں جائیں گے۔
انہوں نے کہا کہ چینی کا کیس سنجید ہ ہوسکتا ہے، پیٹرول کی قیمت غلط وقت پر سستی کی، اس کے بعد سازش کے تحت قیمت بڑھا دی گئی۔
وفاقی وزیر نے کہا کہ وزیراعظم اور آرمی چیف نے ہر جگہ ایم ایل ون کی بات کی، رواں سال ریلوے کی ترقی کا سال ہے، ایم ایل ٹو پر ایک ٹرین چلائیں گے۔
انہوں نے کہا کہ چین نے ریلوے کی ترقی میں ہمارے ساتھ بہت تعاون کیا، ایم ایل ون الگ منصوبہ ہے، کوشش ہے کوئی مزدور بےروزگار نہ ہو۔
وفاقی وزیرریلوے کا کہنا تھا کہ ریلوے کرایوں میں اضافے کی تجویز میں نے مستر د کر دی، آرمی چیف کی قیادت میں ایم ایل ون مکمل ہو گا۔
