کورونا وائرس کے خلاف بہتر حکمت عملی کے باعث پاکستان میں اس وبا کے ایکٹو کیسز میں نمایاں کمی دیکھنے میں آئی ہے، اس وقت یہ شرح کم ہوتی ہوئی 43 فیصد تک پہنچ گئی ہے۔
اب تک وائرس سے متاثرین کی کل تعداد 2 لاکھ 31 ہزار سے زائد ہو چکی ہے جن میں سے ایک لاکھ ایک ہزار ایکٹو مریض ہیں جبکہ باقی ایک لاکھ 29 ہزار 830 افراد صحتیاب ہو کر گھر واپس جا چکے ہیں۔
گزشتہ 24 گھنٹوں کے دوران ملک بھر میں 3763 نئے کیسز سامنے آئے ہیں جبکہ 4736 مریض صحتیاب ہوئے ہیں اور 65 افراد جاں بحق ہوئے ہیں۔
وزارت نیشنل ہیلتھ سروس کے ترجمان ساجد شاہ نے ڈان نیوز کو بتایا کہ وزیراعظم عمران خان کی جانب سے اسمارٹ لاک ڈاؤن کی حکمت عملی نے وبا کا پھیلاؤ روکنے میں اہم کردار ادا کیا ہے۔
انہوں نے کہا کہ ملک میں کورونا کا مرکز بننے والے علاقوں میں لاک ڈاؤن کرنے سے نئے مریضوں کی آمد تھم گئی ہے جبکہ صحتیاب ہونے کی شرح اسی طرح برقرار ہے۔
نیشنل کمانڈ اینڈ آپریشن سنٹر (این سی او سی) کے مطابق کورونا کے کل مریضوں میں سے 57 فیصد صحتیاب ہو چکے ہیں جبکہ صرف 43 فیصد ایکٹو مریض رہ گئے ہیں۔
اس سے قبل حکومتی سطح پر یہ خدشات ظاہر کیے گئے تھے کہ جون کے آخر تک مریضوں کی تعداد 3 لاکھ تک پہنچ سکتی ہے مگر اسمارٹ لاک ڈاؤن کے باعث یہ تعداد 2 لاکھ تک پہنچی تھی۔
