عزیر بلوچ کے ساتھی حبیب جان نے ایک انٹرویو میں انکشاف کیا ہے کہ 2012 کے آپریشن کے بعد پیپلزپارٹی نے عزیر بلوچ کے ساتھ رابطہ کر کے انہیں 5 کروڑ روپے دیے۔
معروف صحافی اطہر کاظمی کے ساتھ انٹرویو کے دوران انہوں نے بتایا کہ لیاری آپریشن ختم ہونے کے بعد عزیر بلوچ ایک مرتبہ پھر پیپلزپارٹی کا حصہ بن گئے جس کے بعد قائم علی شاہ، شرمیلا فاروقی اور فریال تالپور لیاری گئیں جہاں انہوں نے عزیر بلوچ کے ساتھ ملاقات کی۔
حبیب جان کا کہنا تھا کہ چوہدری اسلم، رحمان ملک اور پیپلزپارٹی کے دیگر رہنما مجھے تمام معاملات کا سرغنہ گردانتے تھے۔
انہوں نے کیا کہ عزیر بلوچ نہ صرف پولیس کے عام افسروں کے بلکہ آئی جی سندھ تک کے تبادلے کیا کرتا تھا، وزارت داخلہ رحمان ملک کی صورت میں اس کے دروازے پر کھڑی رہا کرتی تھی۔
اپنے انٹرویو میں انہوں نے مزید راز افشا کرتے ہوئے بتایا کہ آصف زرداری کے ساتھ عزیر بلوچ کی ملاقات ہوئی تھی جو بہت اہم تھی، عزیر بلوچ نے مجھے بتایا کہ آصف زرداری مجھ سے ملنا چاہتے ہیں اور قادر پٹیل کے ساتھ جانا ہے۔
ان کا کہنا تھا کہ آصف زرداری چاہتے تھے کہ ان کے بھائی لیاری سے الیکشن لڑیں، اس دوران مظفر ٹپی وہاں آ گئے جس سے جھگڑا شروع ہوا۔
حبیب جان کے مطابق جب حکومت کو خطرہ لاحق ہوا تو عزیر بلوچ کے پیپلزپارٹی کے ساتھ تعلقات ختم ہو گئے۔
یہ ویڈیو وفاقی وزیر برائے بحری امور علی زیدی نے بھی ٹویٹ کی اور کہا کہ جرم اور سیاست ساتھ ساتھ چلتے رہے، حبیب خان نے آصٖف زرداری اور قادر پٹیل کو بےنقاب کر دیا ہے۔
یاد رہے کہ علی زیدی نے اس سے قبل کہا تھا کہ عزیر بلوچ کی جے آئی ٹی رپورٹ نامکمل ہے، اس میں 6 نام موجود ہی نہیں ہیں۔
پریس کانفرس سے خطاب کرتے ہوئے انہوں نے کہا کہ عزیر بلوچ نے کہا کہ سرکی قیمت فریال تالپور اور آصف زرداری کے کہنے پرختم کی گئی۔
انہوں نے مزید کہا کہ عزیزبلوچ نے اعتراف کیا تھا کہ اس نے سینیٹر یوسف کے کہنے پر قائم علی شاہ سے ملاقات کی۔
انہوں نے کہا کہ ذوالفقار مرزا کے بعد اویس ٹپی عزیربلوچ سے کام لیتا تھا
علی زیدی کا کہنا تھا کہ جے آئی ٹی میں ایک شخص درجنوں قتل کا اعتراف کرتا ہے لیکن یہ کہیں نہیں بتایا کہ اس نے یہ قتل کس کے کہنے پر کیے۔
انہوں نے کہا کہ نبیل گبول نے گزشتہ رات کہا ہے کہ جے آئی ٹی رپورٹ مکمل نہیں ہے، جے آئی ٹی رپورٹ کے صفحہ نمبر 7 میں عزیر بلوچ فریال تالپور سے ملاقات کی بات کرتا ہے، آخری صفحے پر وہ اس خدشہ کا اظہار کرتا ہے کہ مجھے اور اہل خانہ کو جان سے مار دیا جائے گا۔
