کوہاٹ ٹنل بلاک سے تیل اور گیس کے وسیع ذخائر دریافت ہوئے ہیں۔ ہنگری کی کمپنی کی ڈرلنگ کے نتیجے میں یہ ذخائر ملے ہیں۔
ہنگری کی کمپنی مول کے اعلامیہ میں بتایا گیا ہے کہ کوہاٹ کے مامیخیل جنوبی کے ایک نمبر کنویں کی کھدائی کی گئی جو 23 کو مکمل ہوئی تھی۔
اعلامیے کے مطابق یہاں سے روزانہ ایک کروڑ 61 لاکھ مکعب فٹ گیس روزانہ حاصل ہو گی جبکہ یومیہ 3 ہزار 240 بیرل خام تیل بھی حاصل ہو گا۔
اعلامیے میں بتایا گیا ہے کہ ہنگری کی کمپنی نے گزشتہ 21 سالوں میں 13ویں بار تیل و گیس کے ذخائر دریافت کیے ہیں۔
مول کمپنی کی جانب سے مزید ٹیسٹنگ جاری ہے، کمپنی اب تک صرف خیبرپختونخوا میں 10ویں بار ذخائر دریافت کر چکی ہے۔
واضح رہے کہ ان ذخائر کی دریافت سے قبل گزشتہ سال بھی سندھ اور بلوچستان میں گیس اور تیل کے نئے ذخائر دریافت ہوئے تھے۔
بہت سے ماہرین کا کہنا ہے کہ پاکستان کے صوبہ بلوچستان اور خیبرپختونخوا میں تیل و گیس کے وسیع ذخائر موجود ہیں جن کی دریافت کے بعد قیمتی زرمبادلہ بھی بچایا جا سکتا ہے اور ملکی ضروریات بھی پوری ہو سکتی ہیں۔
