وزارت داخلہ نے امریکی شہری سنتھیا رچی کو کلین چٹ دے دی

وزارت داخلہ نے امریکی شہری سنتھیا رچی کو ڈی پورٹ کرنے کے حوالے سے اپنی رپورٹ اسلام آباد ہائی کورٹ میں جمع کرا دی ہے۔

رپورٹ میں وزارت داخلہ نے بتایا ہے کہ سنتھیا رچی پاکستان میں قانونی طور پر رہائش پذیر ہیں، وہ کسی قسم کی غیر قانونی یا ریاست مخالف سرگرمیوں میں ملوث نہیں ہیں۔

رپورٹ میں مزید بتایا گیا ہے کہ امریکی خاتون سمیت دیگر غیرملکیوں کے ویزے میں 31 اگست تک توسیع کی گئی تھی اور وہ اس عرصہ تک پاکستان میں قانونی طور پر رہ سکتی ہیں۔

رحمان ملک پر زیادتی کا الزام لگانے والی خاتون سنتھیا رچی نے مزید تفصیل بتا دی

امریکی خاتون سنتھیا رچی کا سفری ریکارڈ سامنے آ گیا، 52 بار پاکستان آئیں

وزارت داخلہ نے اسلام آباد ہائی کورٹ کو بتایا ہے کہ سنتھیا رچی نے اپنے ویزے میں مزید توسیع کی درخواست دی ہوئی ہے جس پر 31 اگست کے بعد فیصلہ کیا جائے گا۔

امریکی خاتون کے خلاف پاکستان پیپلزپارٹی نے تھانہ کوہسار میں بینکنگ قوانین کی مبینہ خلاف ورزی پر ایک درخواست جمع کرائی ہے جس میں یہ موقف اختیار کیا گیا ہے کہ سنتھیا رچی پاکستان میں بزنس ویزہ پر مقیم ہیں لیکن انہوں نے ایک نجی بینک میں اکاؤنٹ کھلواتے وقت خود کو ملازمت پیشہ ظاہر کیا ہے۔

پاکستان پیپلزپارٹی کے ترجمان راولپنڈی ڈویژن راجا عمار شوکت کی جانب سے جمع کرائی گئی اس درخواست میں کہا گیا ہے کہ سنتھیا رچی کے پاسپورٹ کے مطابق وہ امریکی ریاست لوزیانہ میں پیدا ہوئی تھیں جبکہ انہوں نے نجی بینک میں اکاؤنٹ کھلواتے وقت اپنی پیدائش کیلیفورنیا میں ظاہر کی ہے۔

انہوں نے درخواست میں مزید کہا کہ امریکی خاتون نے اپنے اکاؤنٹ کے ذریعے عوام سے فنڈز بھی مانگے ہیں جو قانون کی واضح خلاف ورزی ہے۔