طویل العمری کے متعلق ایک نئی تحقیق سامنے آئی ہے جس میں بتایا گیا ہے کہ جنوبی کوریا کی خواتین کی اوسط عمر پہلی بار 90 سال سے زائد ہونے جا رہی ہے، قبل ازیں سائنسدان اسے ناممکن سمجھتے تھے۔
دی امپیریل کالج لندن اور عالمی ادارہ صحت کی مشترکہ رپورٹ کے مطابق صنعتی طور پر ترقی یافتہ ممالک میں اوسط عمر میں اضافہ ہو رہا ہے۔
رپورٹ میں اندازہ لگایا گیا ہے کہ 2030 میں پیدا ہونے والی جنوبی کوریا کی لڑکیوں کی اوسط عمر 90.8 برس ہو گی جبکہ لڑکوں کی اوسط عمر 84.1 سال ہو گی۔
اس وقت جاپان اوسط عمر کے لحاظ سے دنیا بھر میں سب سے آگے ہے تاہم 2030 میں جنوبی کوریا اور فرانس اسے پیچھے چھوڑ جائیں گے۔
اس وقت تک امریکہ کئی امیر ممالک سے بہت پیچھے رہ جائے گا جہاں مردوں کی اوسط عمر 79.5 اور خواتین کی 83.3 برس ہو گی۔
امریکہ کے پیچھے رہ جانے کی وجوہات میں ہر شہری کے لیے ہیلتھ انشورنس کا فقدان، بچوں میں اموات کی بلند شرح اور موٹاپے کی بڑھتی ہوئی سطح ہوں گی۔
اس کے برعکس جنوبی کوریا میں موٹاپے کی سطح پوری دنیا میں کم ہے، اس کے ساتھ ساتھ خوراک کا معیار بہتر ہے، تمباکو نوشی کم لوگ کرتے ہیں اور صحت کا نظام شاندار ہے۔
فرانس کے متعلق رپورٹ میں کہا گیا ہے کہ 2030 میں پیدا ہونے والی لڑکیوں کی اوسط عمر 88.55 برس اور لڑکوں کی 81.74 برس ہو گی۔
رپورٹ کے مطابق جاپان میں 2030 میں پیدا ہونے والے مردوں کی اوسط عمر 82.75 برس اور خواتین کی 88.41 ہو گی، سوئٹزر لینڈ میں یہ شرح 83.95 اور 87.70، آسٹریلیا میں 84 اور 87.57، کینیڈا میں 83.98 اور 87.09 ہو گی۔
اسی طرح جرمنی میں مردوں کی اوسط عمر 81.96 اور خواتین کی 85.86، برطانیہ میں 82.47 اور 85.25، سنگاپور میں 79.57 اور 84.81 اور امریکہ میں 79.51 اور 83.32 ہو گی۔
