وزیراعظم کی معاون خصوصی برائے ڈیجیٹل پاکستان تانیہ ایدروس کے استعفیٰ کے بعد معاون خصوصی ڈاکٹر ظفر مرزا بھی اپنے عہدے سے مستعفی ہو گئے۔
تانیہ ایدروس نے کہا کہ وہ اپنی دہری شہریت کے معاملے پر ہونے والی تنقید کے باعث عہدے سے استعفیٰ دے رہی ہیں۔
ایک ٹویٹ میں ان کا کہنا تھا کہ میری شہریت کی وجہ سے ریاست پر ہونے والی تنقید سے ڈیجیٹل پاکستان کے مقاصد متاثر ہو رہے تھے۔
تانیہ ایدروس نے مزید کہا کہ وسیع تر قومی مفاد میں انہوں نے معاون خصوصی کے عہدے سے استعفیٰ دے دیا ہے، انہوں نے اپنے استعفیٰ کی تصویر بھی ٹویٹ کے ساتھ لگائی ہے۔
تانیہ ایدروس کے فوری بعد ڈاکٹر ظفر مرزا نے بھی اپنے عہدے سے استعفیٰ دینے کا اعلان کر دیا، انہوں نے کہا کہ وہ عالمی ادارہ صحت چھوڑنے کے بعد وزیراعظم کی ذاتی دعوت پر پاکستان آئے تھے۔
انہوں نے کہا کہ میں نے پوری دیانت داری اور محنت سے کام کیا ہے، مجھے اطمینان ہے کہ میں اس وقت چھوڑ رہا ہوں جب قومی سطح کی عظیم کاوشوں کی بدولت کورونا پاکستان میں کم ہو رہا ہے۔
ڈاکٹر ظفر مرزا نے کہا کہ انہوں نے معاونین خصوصی پر ہونے والی منفی تنقید کے باعث استعفیٰ دے رہے ہیں۔
وزیراعظم عمران خان نے دونوں استعفے منظور کر لیے ہیں جس کے بعد کیبنٹ ڈویژن نے نوٹی فکیشن جاری کر دیا ہے۔
