پاکستان کے معروف بلے باز عمر اکمل کی اپیل پر فیصلہ سناتے ہوئے ان کی سزا 3 سال سے کم کر کے ڈیڑھ سال کر دی گئی ہے۔
انہوں نے پاکستان کرکٹ بورڈ کے اینٹی کرپشن کوڈ کے تحت دی گئی سزا کے خلاف اپیل کی تھی، فیصلے کے وقت عمر اکمل بھی پی سی بی کے ہائی پرفارمنس سینٹر میں موجود تھے۔
بعد ازاں انہوں نے میڈیا سے بات کرتے ہوئے کہا کہ وہ اپنے وکلاء سے مشاورت کے بعد اس فیصلے کے خلاف دوبارہ اپیل کریں گے۔
دوسری جانب عمر اکمل کے وکیل نے فیصلے کو اچھا قرار دیا مگر یہ بھی کہا کہ یہ فیصلہ ان کی توقعات کے خلاف ہے۔
اس ماہ کے آغاز میں پی سی بی نے اعلان کیا تھا کہ عمر اکمل کی 3 سالہ کرکٹ کھیلنے پر پابندی کے خلاف اپیل پر فیصلہ محفوظ کر لیا گیا ہے۔
فیصلہ سپریم کورٹ کے سابق جج جسٹس (ر) فقیر محمد کھوکھر نے لکھا ہے۔
عمر اکمل کے خلاف الزام تھا کہ انہوں نے ان بدعنوان عناصر کے متعلق بورڈ کو نہیں بتایا جنہوں نے 2020 کے پاکستان سپر لیگ سے پہلے ان تک رسائی کی کئی کوششیں کی تھیں۔
