اسلام آباد: صحافیوں کے تحفظ کے لیے ایک بڑا اقدام کرتے ہوئے وفاقی کابینہ نے جرنلسٹ پروٹیکشن بل کی منظوری دے دی ہے۔
پروٹیکشن آف جرنلسٹس اینڈ میڈیا پروفیشنلز ایکٹ 2019 کے مطابق ہرصحافی کو ذاتی زندگی، اہل خانہ اور امورکار میں مداخلت سے بچاؤ کا حق حاصل ہو گا۔
ایکٹ میں مزید کہا گیا ہے کہ کوئی بھی صحافی کسی ایسے مواد کے پھیلاؤ میں شامل نہیں ہو گا جو جھوٹا اور حقائق کے منافی ہو، حکومت کسی ادارے، شخص یا اتھارٹی کی طرف سے صحافی کی کردارکشی، تشدد یا استحصال سے تحفظ دے گی۔
ایکٹ کے مطابق صحافی اپنے خلاف کردارکشی، تشدد اوراستحصال پر14 دن کے اندر کمیشن کو شکایت درج کرائے گا، کسی صحافی کوآزادانہ طور پر پیشہ ورانہ امورنمٹانے کے راستے میں رکاوٹیں نہیں کھڑی کی جائیں گی۔
پروٹیکشن آف جرنلسٹس اینڈ میڈیا پروفیشنلز ایکٹ 2019 میں کہا گیا ہے کہ صحافی کے ذرائع کو خفیہ رکھنے کیلئے حکومت قانون کے ذریعے تحفظ فراہم کرے گی۔
صحافی کواس کے ذرائع بتانے کیلئے نہ مجبور کیا جائے گا نہ ہی زبردستی کی جائے گی۔
