کورونا کے باعث سماجی فاصلہ برقرار رکھنے کے لیے مصر کے دارالحکومت قاہرہ کے ایک ریستوران میں روبوٹ ویٹر گاہکوں سے آرڈر لینے لگا۔
قاہرہ کے کمبو ریسٹونٹ اینڈ کیفے میں تمام دن متحرک رہنے والا موزو نامی روبوٹ لوگوں کی دلچسپی کا مرکز بن گیا ہے۔
یہ چھوٹا سا روبوٹ کیفے کا نیا ملازم ہے جو نہ صرف آرڈرز لیتا ہے بلکہ گاہکوں تک کھانا بھی پہنچاتا ہے، اس نے صاف سھترا ایپرن اور ٹائی پہنی ہے اور اس کا نام واضح طور پر لکھا ہوا ہے۔
گاہک اس کے بٹن دبا کر اپنا مینو منتخب کرتے ہیں اور موزو کچن میں جا کر مطلوبہ خوراک ان تک پہنچا دیتا ہے۔ بچوں کے لیے موزو خصوصی دلچسپی کا مرکز ہے۔
کچن میں موجود کیفے کا ملازم اس میں پاس کوڈ داخل کرتا ہے جس کے ذریعے متعلقہ میز پر موجود گاہکوں کے آرڈر کنفرم ہوتے ہیں۔
کیفے کے ایک گاہک 33 سالہ بینکر محمد بسام کا کہنا ہے کہ مجھے اس دلکش روبوٹ کو دیکھ کر بہت جوش محسوس ہوتا ہے، اس کی وجہ سے انسانی رابطہ محدود ہو جاتا ہے اور کیفے میں حفظان صحت کے معیار میں بہتری آتی ہے۔
ماہرین کا کہنا ہے کہ روبوٹس کو ویٹر کا کردار سونپنے سے سماجی فاصلہ برقراررکھنے کے ساتھ ساتھ مصر میں وائرس ک پھیلاؤ کم کرنے میں مدد مل سکتی ہے۔
مصر میں وبا سے خوفزدہ لوگ ریستورانوں میں جانے سے ہچکچاتے ہیں اور خوراک کو دوسرے انسانوں کے چھونے کو ناپسند کرتے ہیں، اس لیے روبوٹس کو متعارف کرانے کی وجہ سے اس کاروبار میں بہتری آنے کا امکان ہے۔
