راستہ بھٹک جانے کے بعد بحرالکاہل کے ایک غیرآباد جزیرے پر پھنس جانے والے تین افراد ریت پر ایک بڑا ایس او ایس میسج لکھنے کی وجہ سے تلاش کر لیے گئے۔
تفصیلات کے مطابق یہ افراد 3 روز سے مائیکرونیشیا کے جزائر سے لاپتہ ہو گئے تھے جس کے بعد ان کی تلاش میں نکلے آسٹریلیا اور امریکہ کے ہوائی جہازوں نے ایک چھوٹے جزیرے پکلٹ کی ریت پر لکھے گئے ایس او ایس کو دیکھ لیا۔
یہ تینوں لوگ پلاوٹ سے 30 جولائی کو ایک 7 فٹ طویل کشتی میں سفر پر نکلے مگر راستہ بھٹک گئے اور تیل ختم ہونے کے بعد ایک چھوٹے سے غیرآباد جزیرے پر پہنچ گئے۔
ان کی گمشدگی کے بعد حکام نے تلاش کے لیے آسٹریلیا سے مدد طلب کی جس پر ہوائی میں فوجی مشقوں سے واپس آنے والے جنگی جہاز کینبرا کو اس علاقے کی طرف موڑ دیا گیا، بعد ازاں ان کے ساتھ امریکی جہاز بھی شامل ہو گئے۔
گمشدہ افراد اپنی مطلوبہ منزل سے 190 کلومیٹر دور جزیرے پر ملے، ان کی حالت ٹھیک تھی، آسٹریلیا کے فوجی ہیلی کاپٹر نے جزیرے کے ساحل پر اتر کر انہیں خوراک اور پانی فراہم کیا۔
کینبرا کے کپتان ٹیری ماریسن نے کہا کہ مجھے اپنے عملے کے پروفیشنل ازم اور ریسپانس پر فخر ہے، ہم دنیا میں جہاں بھی ہوں سمندر میں جانوں کی حفاظت میں حصہ لینا ہمارا فرض ہے۔
یاد رہے کہ ایس او ایس بین الاقوامی طور پر تسلیم کیا گیا سگنل ہے جس کا مطلب ‘ہماری جان بچائیں’ ہے، اس کا آغاز مورس کوڈ سے ہوا تھا۔
