پاکستان کے وزیرخارجہ شاہ محمود قریشی نے کہا ہے کہ ہم سعودی عرب سے تقاضا کرتے ہیں کہ وہ کشمیر کے مسئلے پر ہمارے ساتھ کھڑے ہوں اور انہوں نے ایسا نہ کیا تو میں عمران خان سے کہوں گا کہ اب مزید انتظار نہیں ہو سکتا، ہمیں سعودیہ عرب کے ہممراہ اور اس کے بغیر آگے بڑھنا ہو گا۔
انہوں نے کہا کہ میں او آئی سی سے کہتا ہوں کہ اگر آپ کونسل آف فارن منسٹرز کا اجلاس نہیں بلا سکتے تو میں وزیراعظم سے کہوں گا کہ جو مسلمان ممالک کشمیر پر ہمارا ساتھ دینا چاہتے ہیں ان کا اجلاس بلا لیں چاہے وہ او آئی سی کے فورم پر ہو یا نہ ہو۔
اے آر وائی پر کاشف عباسی کے پروگرام میں انہوں نے کہا کہ آج او آئی سی کو فیصلہ کرنا ہے کہ کیا وہ اس حساس مسئلے پر ہمارا ساتھ دینا چاہتی ہے کہ نہیں؟ اب وقت آ گیا ہے کہ او آئی سی بچ بچاؤ اور آنکھ مچولی سے باہر نکلے۔
انہوں نے سعودی عرب کے حکمرانوں کو مخاطب کر کے کہا کہ پاکستان کا مسلمان جو آپ کے لیے لڑ مرنے کے لیے تیار ہے وہ آپ سے تقاضا کر رہا ہے کہ آپ اس موقع پر قائدانہ صلاحیت کا مظاہرہ کریں، اگر انہوں نے ایسا نہ کیا تو میں عمران خان سے کہوں گا کہ اب مزید انتظار نہیں ہو سکتا، ہمیں سعودیہ عرب کے ہمراہ یا اس کے بغیر آگے بڑھنا ہو گا۔
شاہ محمود قریشی کا کہنا تھا کہ خلیجی ممالک کے حکمرانوں کو عوامی جذبات کو دیکھنا چاہیئے، ہم جس مسئلے کے متعلق حساس ہیں ان پر ہمارا ساتھ دینا چاہیئے۔
