وفاقی وزیر منصوبہ بندی اسد عمر نے کہا ہے کہ ملک بھر میں ایس او پیز کے تحت ریسٹورنٹ، تھیٹرز اور سینما گھر 10 اگست سے کھول دیے جائیں گے جبکہ شادی ہالز اور تعلیمی ادارے 15 ستمبر کو ہی کھلیں گے۔
وزیراعظم عمران خان کی سربراہی میں ہونے والے قومی رابطہ کمیٹی کے اجلاس کے بعد وفاقی وزیر نے میڈیا سے بات کرتے ہوئے کہا کہ جمز اور کلبز کو بھی 10 اگست سے کھولنے کی اجازت ہوگی۔
فیصلوں کی تفصیل بتاتے ہوئے انہوں نے کہا کہ مارکیٹوں پر وقت کی پابندی اور ہفتہ ، اتوار کی چھٹی ختم کی جارہی ہے، ریسٹورنٹس میں باہر اور اندر بیٹھنے کی اجازت ہو گی، ہوٹلز بھی شادی کے فنکشن کرسکتے ہیں۔
اسد عمر نے مزید بتایا کہ ایکسپو ہالز ، بیوٹی پارلرز اور مزاروں کو بھی کھولا جا رہا ہے، تماشائیوں کے بغیر اسپورٹس سرگرمیوں کی اجازت ہوگی جبکہ موٹرسائیکل پر ڈبل سواری پر عائد پابندی بھی ہٹائی جا رہی ہے۔
انہوں نے کہا کہ ریلوے اور ایئر لائن فری آپریٹ کرسکیں گے، دونوں میں سیٹیں چھوڑنے کی بندش ستمبر کے آخر تک برقرار رہے گی۔ یکم اکتوبر سے مسافر جہازوں میں نارمل سفر کر سکیں گے۔
انہوں نے اعلان کیا کہ تعلیمی ادارے 15 ستمبر سے کھولے جائیں گے، 7 ستمبر کو آخری ریویو کریں گے، 14 اگست کے لیے خصوصی احکامات جاری ہوں گے، محرم سے متعلق علمائے کرام کے ساتھ مل کر ایس اوپیز بنائی جا چکی ہیں۔
انہوں نے بتایا کہ ایران میں وبا کی دوسری لہر جاری ہے، گزشتہ دو ہفتوں کے دوران ہلاکتیں زیادہ ہو رہی ہیں، اسی طرح بھارت میں روزانہ کی بنیاد پر 50 ہزار سے زائد کیسز رپورٹ ہو رہے ہیں۔
وفاقی وزیر کا کہنا تھا کہ کورونا وبا کے حوالے سے کافی بہتری سامنے آئی ہے اور عوام کے تعاون سے صورتحال کنٹرول میں آئی ہے۔
