بھارت کی فلم انڈسٹری میں خودکشی کے بڑھتے رجحان نے تشویش پیدا کر دی ہے، سشانت سنگھ کی موت ایک بڑا سانحہ تھا جس نے بالی وڈ کے کئی پوشیدہ مگر تاریک گوشے آشکار کیے۔
گزشتہ روز ایک اور معروف اداکار سمیر شرما کی موت کو پولیس نے امکانی طور پر خودکشی قرار دیا تھا اور اب بھوج پوری فلموں کی اداکارہ انوپما پھاٹک نے مبینہ طور پر خود کشی کر لی ہے۔
پولیس کے مطابق سمیر شرما نے اسی سال فروری میں اپارٹمنٹ کرائے پر لیا تھا۔ رات کو ڈیوٹی کے دوران سوسائٹی کے چوکیدار نے لاش کو دیکھا اس کے بعد اس نے حادثہ کے بارے میں سوسائٹی کے دوسرے لوگوں کو بتایا۔
40 سالہ اداکارہ ممبئی میں اپنے فلیٹ میں رسی سے لٹکتی پائی گئیں، ان کا تعلق بہار سے تھا اور انہوں نے متعدد بھوج پوری فلموں اور ٹی وی ڈراموں میں کام کیا تھا۔
اپنی موت سے ایک روز قبل انہوں نے فیس بک ویڈیو میں کہا تھا کہ انہوں نے ایسا دھوکہ کھایا ہے جس کے بعد وہ کسی پر اعتبار کرنے کے قابل نہیں ہیں۔ انہوں نے کہا کہ ایسا کوئی دوست نہیں ہے جو ان کی مدد کر سکے۔
پولیس کا کہنا ہے کہ انوپما پھاٹک نے اس وقت خودکشی کی جب ان کا شوہر گھر میں نہیں تھا، ان کی لاش کے قریب خودکشی کا نوٹ بھی ملا ہے۔
ایک پولیس افسر کا کہنا ہے کہ ان کی دوست نے ان سے گاڑی مانگی تھی جو واپس نہیں کی جس سے وہ بہت مایوس تھیں، اس کے علاوہ کورونا وائرس کے باعث مالی مشکلات کا شکار بھی تھیں۔
