ٹک ٹاک کا متبادل لانچ کرنے کے بعد فیس بک کے بانی مارک زکربرگ کی دولت 100 ارب ڈالرز کی حد عبور کر گئی ہے۔
فیس بک کے بانی مارک زکربرگ کی ذاتی دولت شارٹ فام ویڈیو فیچر ‘ریلس’ لانچ کرنے کے بعد 76 ارب ڈالرز سے بڑھ کر 100 ارب ڈالرز ہو چکی ہے۔
فیس بک بھی میدان میں آ گیا، ٹک ٹاک جیسا نیا فیچر متعارف کرا دیا
‘ایپ بیچو یا پابندی کے لیے تیار رہو’، ٹرمپ کا ٹک ٹاک انتظامیہ کو واضح پیغام
بدھ کے روز فیس بک نے اپنے حریف ٹک ٹاک کے مقابلے میں اپنی مقبول ایپ انسٹا گرام پر ریلس نامی ایک فیچر متعارف کرایا جس کے بعد فیس بک کے شیئرز میں 6 فیصد اضافہ ریکارڈ کیا گیا ہے۔ مارک زکربرگ اس کمپنی میں 13 فیصد شیئرز کا مالک ہے۔
اب مارک زیوکربرگ ایمازون کے بانی جیف بیزوز اور مائیکروسافٹ کے بانی بل گیٹس کے نام نہاد 100 ارب ڈالرز کی ملکیت والے کلب میں شامل ہو گئے ہیں۔
حال ہی میں ٹیکنالوجی سے متعلق بڑی بڑی کمپنیوں کے مالکان اپنی پاور اور مسلسل بڑھتی ہوئی دولت کے باعث توجہ کا مرکز رہے ہیں۔
کورونا وائرس کی وجہ سے ہونے والے لاک ڈاؤن سے سب سے زیادہ فائدہ ایپل، ایمازون، گوگل اور فیس بک کو ہوا کیونکہ لاک ڈاؤن کے دوران لوگوں نے آن لائن شاپنگ اور انٹرٹینمنٹ کو ترجیح دی۔
یاد رہے کہ مارک زکربرگ کی ذاتی دولت میں رواں سال 22 ارب ڈالرز کا اضافہ ہوا ہے۔
ریلس کا فیچر کچھ دن پہلے اس وقت منظر عام پر آیا جب مائیکروسافٹ چینی کمپنی بائٹ ڈینس سے ٹک ٹاک ایپ کی خریداری کے لیے کوشاں ہے۔ ذرائع کے مطابق بائٹ ڈینس وائٹ ہاؤس کے دباؤ میں آکر ٹک ٹاک کے کچھ حصہ سے محروم ہونے کے لیے تیار ہے کیونکہ ایسا نہ ہونے پر صدر ٹرمپ نے امریکہ میں ٹک ٹاک سمیت دیگر کئی ایپس پر سیکیورٹی خدشات کے بہانے پابندی عائد کرنے کا عندیہ دیا ہے۔
ریلس کی لانچ نے فیس بک اور ٹک ٹاک کے درمیان جاری لڑائی کو مزید بڑھا دیا ہے کیونکہ دونوں کا مقصد زیادہ سے زیادہ امریکی نوجوانوں کو متوجہ کرنا یا راغب کرنا ہے۔
