چمن میں بم دھماکے میں 5 افراد جاں بحق اور 17 زخمی ہو گئے، دھماکہ ڈی پی او آفس کے قریب ہوا ہے۔
پولیس کے مطابق بم دھماکے میں اینٹی نارکوٹکس فورس کی گاڑی کو نشانہ بنانے کی کوشش کی گئی ہے تاہم جاں بحق ہونے والے تمام افراد عام شہری ہیں، اینٹی نارکوٹکس فورس کے دو اہلکار زخمیوں میں شامل ہیں۔
پولیس کا کہنا ہے کہ نامعلوم دہشت گردوں نے موٹرسائیکل میں ریموٹ کنٹرول بم نصب کیا تھا، ان کا مقصد اے این ایف کی گاڑی کو نشانہ بنانا تھا۔
زخمیوں کو ریسکیو اہلکاروں نے اسپتال منتقل کر دیا جبکہ واقعہ کے بعد پولیس اور قانون نافذ کرنے والے اداروں نے موقع پر پہنچ کر علاقے کو گھیرے میں لے لیا اور شواہد اکٹھے کرنا شروع کر دیا۔
ابھی تک کسی گروہ نے دہشت گردی کی اس کارروائی کی ذمہ داری قبول نہیں کی۔
یاد رہے کہ اس سے قبل بھی متعدد بار اس مقام پر ایک درجن کے قریب بم دھماکے ہو چکے ہیں جن میں درجنوں افراد شہید اور زخمی ہوئے ہیں۔
