لاہور: قومی احتساب بیورو (نیب) میں مریم نواز کی پیشی کے موقع پر پولیس اور مسلم لیگ ن کے کارکنوں میں تصادم ہوا ہے۔
پولیس نے نیب دفتر کی جانب جانے والا راستہ رکاوٹیں لگا کر بند کر دیا تھا، کارکنوں نے اس طرف جانے کی کوشش کی تو پولیس نے آنسو گیس کے شیل پھینکے جبکہ کارکنوں نے پتھراؤ کیا۔
ذرائع کے مطابق صورتحال کو دیکھتے ہوئے نیب نے مریم نواز کو واپس جانے کا کہا مگر انہوں نے انکار کر دیا۔
مریم نواز نے الزام عائد کیا ہے کہ پولیس نے ان کی گاڑی پر حملہ کیا ہے، ٹویٹر اکاؤنٹ پر انہوں نے کہا کہ اگر گاڑی بلٹ پروف نہ ہوتی تو نہ جانے کیا ہوتا۔
نیب دفتر کے باہر میڈیا سے بات کرتے ہوئے انہوں نے کہا کہ اگر آپ کے پاس سچ سننے کی صلاحیت نہیں ہے تو سوچ سمجھ کر بلانا چاہیئے تھا۔
انہوں نے الزام عائد کیا کہ مجھے گھر سے بلانے کا مقصد نقصان پہنچانا تھا، مجھے ضمانت قبل از گرفتاری کا مشورہ دیا گیا جو میں نے مسترد کر دیا۔
ان کا کہنا تھا کہ نیب نے مجھے واپس چلے جانے کے لیے کہا ہے لیکن میں یہاں کھڑی ہوں، دروازہ کھولو، میں جواب دیے بغیر نہیں جاؤں گی۔
