پاکستان کے سابق کرکٹر اور نامور بلے باز جاوید میانداد وزیراعظم عمران خان پر برس پڑے۔
اپنے ویڈیو پیغام میں انہوں نے کہا کہ بورڈ میں جاہل لوگ بیٹھے ہیں جنہیں کرکٹ کے حروف تہجی بھی نہیں پتا، غلط جگہوں پر غلط لوگ بیٹھے ہیں۔
میانداد نے کہا کہ آپ باہر سے بندہ لے کر آ گئے ہو، کل وہ چوری کر کے بھاگ جائے گا تو اسے کہاں سے پکڑیں گے؟ اسے اس لیے لایا گیا ہے کہ اس نے کسی کی مدد کی تھی؟
انہوں نے کہا کہ کیا پاکستان کے لوگ مر گئے ہیں؟ پاکستانیوں سے کہتا ہوں کہ اٹھو! اور اچھے لوگوں کو سامنے لاؤ۔
ان کا کہنا تھا کہ یہ جو لڑکے آج کرکٹ کھیل رہے ہیں ان کا مستقبل بھی اسی کھیل میں ہونا چاہیئے نہ کہ بعد میں وہ سڑک پر ریڑھی چلا رہے ہوں۔
انہوں نے سیاست میں آنے کا عندیہ دیتے ہوئے کہا کہ میں تمہارا کپتان تھا تم میرے کپتان نہیں تھے، اب میں سیاست میں بھی آؤں گا اور بتاؤں گا، تم بات کر سکو تو بتانا مجھے۔
جاوید میانداد نے کہا کہ آپ کو کرکٹ میں چلانے والا میں تھا، آپ تو نعوذ باللہ خدا بن کر بیٹھے ہوں۔ آپ سمجھتے ہو کہ یہاں آپ کے علاوہ کسی کو پتا نہیں۔
انہوں نے وزیراعظم کو نصیحت کی کہ آپ غور کریں کہ کن لوگوں کو لائے ہو، یہ تو بعد میں پتا چلے گا کہ کون کھاتا تھا اور کون نہیں کھاتا تھا۔
