آسٹریلیا میں ایک شخص نے شارک پر حملہ کر کے اپنی بیوی کی جان بچا لی۔
35 سالہ شانٹن ڈوائل نیو ساؤتھ ویلز کے سمندر میں سرفنگ کر رہی تھیں جب ان پر ایک شارک نے حملہ کر دیا، ان کے شوہر مارک رپلے نے اپنی بیوی کو شارک کی گرفت میں دیکھا تو انہوں نے سرفنگ بورڈ سے سمندر میں چھلانگ لگا دی اور خونخوار مچھلی پر مکے برسانے شروع کر دیے۔
10 سالہ لڑکے کو شارک نے کشتی سے کھینچ لیا، باپ بچانے کے لیے سمندر میں کود گیا
شارک نے گھبرا کر شانٹن کو چھوڑ دیا اور سمندر کی طرف چلی گئی جس کے بعد مارک اپنی بیوی کو سہارا دے کر ساحل تک لے آئے۔ انہیں ہیلی کاپٹر کے ذریعے اسپتال پہنچایا گیا، ان کی دائیں ٹانگ بری طرح زخمی ہو گئی ہے۔
ماہرین کا خیال ہے کہ ان پر حملہ کرنے والی شارک مچھلی نوجوان تھی اور اس کی لمبائی 10 فٹ تک تھی۔
سرف لائف سیونگ کے چیف ایگزیکٹو سٹیون پیئرس نے مارک رپلے کی تعریف کرتے ہوئے بتایا کہ اس شخص نے اپنا سرفنگ بورڈ چھوڑ کر سمندر میں چھلانگ لگائی اور شارک پر مکے برسا کر اپنی بیوی کی جان بچائی۔
انہوں نے کہا کہ مارک اس کے بعد اپنی بیوی کو ساحل سمندر تک بھی لے آئے، انہوں نے ایک ہیرو کی طرح یہ کارنامہ سرانجام دیا ہے۔
شانٹن کو ساحل پر موجود افراد نے ابتدائی طبی امداد دی جس کے بعد انہیں اسپتال منتقل کر دیا گیا۔
یاد رہے کہ رواں برس آسٹریلیا میں شارک مچھلی کا یہ تیسرا حملہ ہے، ان میں سے ایک واقعہ میں ایک نوجوان سرفر کی جان چلی گئی تھی۔
