امریکی ریاست کیلیفورنیا کی مشہور ‘ڈیتھ ویلی’ میں کرہ ارض کا بلند ترین درجہ حرارت ریکارڈ کیا گیا ہے۔
امریکی موسمیاتی سروس کے مطابق ڈیتھ ویلی نیشنل پارک میں 130 فارن ہائیٹ (54.4 ڈگری سنٹی گریڈ) درجہ حرارت ریکارڈ کیا گیا ہے جو انسانی تاریخ میں ریکارڈ ہونے والا سب سے زیادہ درجہ حرارت ہے۔
امریکہ کا ویسٹ کوسٹ علاقہ شدید گرمی کی لپیٹ میں ہے جس میں مزید اضافے کا امکان ہے، ڈیتھ ویلی نیشنل پارک بھی اسی علاقے کا حصہ ہے۔
بلند ترین درجہ حرارت کا گزشتہ ریکارڈ 2013 میں اسی علاقے میں قائم ہوا تھا، یہ درجہ حرارت 54 درجے سینٹی گریڈ ریکارڈ کیا گہا تھا۔
کیلیفورنیا کی ڈیتھ ویلی میں جگہ جگہ بینرز لگے ہوئے ہیں جن میں گرم اور خشک موسم کے متعلق خبردار کیا گیا ہے، ایک غیرمصدقہ دعوے کے مطابق ایک صدی قبل یہاں کا درجہ حرارت 56۔6 درجے سینٹی گریڈ تھا۔
1931 میں تیونس میں 55 درجے سینٹی گریڈ گرمی کا دعویٰ کیا گیا لیکن ناکافی انفراسٹرکچر کے باعث اس کی تصدیق نہیں ہو سکی تھی۔
اس وقت امریکہ کا ایروزونا سے واشنگٹن تک کا علاقہ شدید گرمی کی لپیٹ میں ہے تاہم کل سے اس میں کمی آنے کا امکان ہے۔
